«Ұстаз – ұлт болашағы» атты мұғалімдерге арналған салтанатты іс-шара

2025 жылдың 2-3 қазан күндері «AMANAT» партиясының қалалық филиалы мен «Ұстаз» қалалық кәсіподақ бірлестігі қала мұғалімдерін марапаттауға арналған салтанатты іс-шара өткізді. Шара барысында қаланың ең үздік педагогтері марапатталды.

Марапатталғандардың қатарында – М.Маметова атындағы №28 мектеп-лицейінің директоры, Медетбекова Айсулу Темірғалиевна бар. Ол «AMANAT» партиясының Орталық аппараты тарапынан партия Төрағасы Ерлан Қошановтың қолы қойылған Құрмет грамотасымен, сондай-ақ партияның қалалық филиалы атынан Алғыс хатпен марапатталды.

Сондай-ақ, қалалық «Ұстаз» кәсіподағы Айсулу Темірғалиевнаға «Ұстаз кәсiподағына сіңірген еңбегі үшін» атты төсбелгісін табыстады.

Бұл марапаттар – жай ғана назар аудару емес, кәсіби шеберлікке, көшбасшылық қабілетке және білім беру ісіне деген үлкен адалдыққа берілген шынайы баға. Мұғалім мамандығы – даналықты, сабырлылықты, төзімділікті және балаларға деген шынайы сүйіспеншілікті талап етеді. Осындай асыл қасиеттердің бәрі Айсулу Темірғалиевнадай ұстаздың бойынан табылады. Ол ұжымды алға жетелейтін көшбасшы ғана емес, әріптестеріне үлгі бола білетін шабыт беруші де.

Қазіргі тез өзгеріп жатқан заманда мұғалімнің рөлі бұрынғыдан да маңызды – өйткені дәл осы ұстаз тұлғаны қалыптастырып, азаматты тәрбиелеп, елдің болашағын даярлайды.

Мұғалімдердің еңбегінің осындай жоғары деңгейде мойындалуы – олардың еңбегінің қоғам үшін аса маңызды екенін көрсетеді. Бұл – білім саласы үшін атқарылған әрбір игі істің бағалануы.

Осындай маңызды іс-шараны ұйымдастырғаны үшін «AMANAT» партиясының қалалық филиалы мен «Ұстаз» қалалық кәсіподақ бірлестігіне шынайы алғысымызды білдіреміз. Олар ұстаздардың еңбегіне назар аударып, мұғалім мәртебесін көтеруге және қолдауға үлкен үлес қосып отыр.